کراچی : بلوچستان کی مختلف قوم پرست جماعتوں نے مطالبہ کیا ہے کہ زرینہ بلوچ سمیت چار سو سے زائد خواتین و بچوں کو تحقیقاتی اداروں کی حراست سے رہا کرایا جائے۔ کراچی پریس کلب مختلف قوم پرست جماعتوں کے کارکنوں نے مظاہرہ کیا۔ مظاہرین سے خطاب میں مقررین نے کہاکہ سیاسی و مذہبی جماعتوں اور میڈیا کو فلسطین و عراق کے مسائل تو نظر آتے ہیں تاہم بلوچوں کے مصائب ان کی نظروں سے اوجھل ہیں۔


مقررین نے کہا کہ صدر پرویز مشرف نے بلوچوں سے معافی مانگی۔ صدر آصف علی زرداری نے بھی کہا کہ بلوچ محرومی کا شکار ہیں اور انہوں نے بھی بلوچوں سے معافی مانگی تاہم بلوچوں کے خلاف کارروائیاں بند نہیں ہوئیں۔ مقررین نے کہا کہ اب معافی سے بات نہیں بنے گی ،طاقت کا جواب طاقت سے دیا جائے گا۔ مقررین کا یہ بھی کہنا تھاکہ ان کے وسائل اور ان کی زمین پر جنگ ہو رہی ہے۔بلوچ مارے جارہے ہیں اورانہیں ہی مزاحمت کار قرار دیا جارہا ہے۔